Hər bir qadının oxumalı olduğu 10 kitab.

Salam olsun oxuyan hər bir kəsə! Uzun zamandır bloq yazmırdım. Əslində yazırdım amma burda paylaşmırdım, çünki ona da öz səbəblərim var :) Nəyi saxlasam da oxumağı saxlaya bilmədiyim kimi yazmağı da saxlaya bilmərəm heç vaxt. Daha çox instagram səhifəsində haqqında paylaşdığım kitablardan bugün bəzilərini seçib xanımlarımıza təqdim eləmək istəyirəm. Sözsüz ki, qadınlara həsr olunmuş həddən çox kitab var. Burda seçib adını qeyd elədiyim 10 kitab mənim şəxsən qadınlara tövsiyyəmdi. Hər birini oxuduğum üçün belə qənaətə gəldim ki, bunları tək mən yox, zənnimcə bütün qadınlar oxuyub yararlanmalıdır. Odur ki, siyahını sizə təqdim edirəm. Oxuyub faydalansanız, nə xoş mənə :)

1.      Qadınların kitabı - OSHO  

Kitabın adı oxucunu çaşdıra bilər. Ancaq bu, yalnız qadınlar üçün nəzərdə tutulan kitab deyil. İstənilən oxucu əsərdə özünü, dünyasını, onu maraqlandıran sualların cavabını tapa bilər. Bu kitab böyük hind filosofu Oshonun mühazirələri əsasında hazırlanıb. Cinslərarası münasibətlərin – məi­şətdən siyasətə qədər, bütün çalarlarını fundamental şəkildə izah edərək problemdən çıxış yollarını göstərib. Oshonun zəngin və maraqlı fikirlərindən, verdiyi örnəklərdən, elmi və mədəni biliklərindən ibarət bu kitab hər bir qadına müəyyən yollar göstərir. “Qadınların kitabı” insanlar və cinslərarası münasibətləri dünya siyasəti səviyyəsində çözür və elmi uğurların üstünlüyünü insanlığı aparıb çıxardığı böhrana qədər təhlil edərək, bu mövzuda detallı şəkildə oxucuya informasiya və düşünmək üçün imkanlar verir.

2.      Fəallıqdan qorxma – Sheryl Sandberg  

Biznes dünyası qadınlara indiyədək bilinməyən müəyyən qaydalar diktə edir. Zəka və iradə keyfiyyətlərini daha çox nümayiş etdirmək lazım deyildir. Karyera pilləkənində öz ambisiyalarını və irəli getmək cəhdlərini göstərməyə dəyməz. Bundan başqa, qadınları öz şəxsi, daxili maneələri ləngidir. Qadınların nə üçün karyeralarını buraxmalarının, doğrudan da, yüzlərlə ciddi səbəbləri vardır. Onlar özlərinə inamlarının kifayət qədər olmamasına, özlərinə həddən artıq diqqət yetirmələrini istəmədiklərinə görə irəli gedə bilmirlər. Nəticədə bu gün dünyanın aparıcı şirkətlərinin rəhbərlərindən yalnız 4 faizi qadınlardır. Facebook-un əməliyyat direktoru Şeril Sendberq biznes dünyasında ən nüfuzlu simalardan biri kimi özünün professional yolunda nə kimi əngəllərlə rastlaşdığından danışır. Bu kitab qadının karyerada və biznesdə özünü göstərmək hüququnu nümayiş etdirənlərin hamısı üçün ruhlandırıcı manifest və mənbədir. Kitaba görə, ailədə münasibətlər bərabər tərəfdaşlıq əsasında qurulmalıdır. Kitab ailə ilə karyera arasında düzgün balans tapılması və qadınların irəli getməsinə mane olan qorxulara qarşı necə mübarizə aparılması haqqında əməli məsləhətlərlə boldur.

3.      Qadın psixologiyası (Kadın Psikolojisi) - Prof. Dr. Nevzat Tarhan

 Kitab aşağıdakı mövzuları geniş əhatə edir:

• ·         Psixoloji fərqliliklərin analizi;
• ·         Qadın, kişi münasibətləri;
• ·         Qadınlara xas ruhsal məsələlər;
• ·         Qadınların bəyənilmə duyğusu;
• ·         Ev xanımlığı bir kabusmudur?;
• ·         Feminizmin evlilik üzərində təsirləri;
• ·         Tərkedilmə qorxusu;
• ·         Analıq psixologiyası;
• ·         Şiddət görən qadınların rahatsızlıqları;
• ·         Moda və qadın;
• ·         Qadın və iş;
• ·         Qadınların dinə meyli; və s.

4.    Min Möhtəşəm Günəş – Xalid Hüseyni

 Kitab Əfqanıstanı darmadağın edən müharibənin qurbanı olmuş iki əfqan qadınının həyatından bəhs edir: əfqanlı zəngin birisinin nikahdankənar qızı, uşaqlıqdan ailə sevgisindən məhrum olmuş Məryəm və mehriban ailənin sevimli qızı, maraqlı və rəngarəng həyat arzusunda olan Leyla. Onların arasında ümumi heç nə yoxdur, ayrı-ayrı dünyalarda yaşayırlar, amma müharibə onların həyat yolunu birləşdirir. Özləri də bilmir onlar kimdir – rəqib, rəfiqə, yoxsa bacı. Təklikdə orta əsr despotizminə, amansızlığa qarşı dura bilməyəcəklərini başa düşüb birlikdə mübarizə aparırlar, ağır sınaqlardan keçirlər.

“Min möhtəşəm günəş” güclü, dramatik, lirik romandır – oxucu qəlbini riqqətə gətirən ağrısı, sevinci ilə, nəcib məqsədi, sonsuz lütfü ilə.

5.      EŞQ – Elif Şafak

Mövlana və Təbrizinin həyatına əsaslanan gözəl bir eşq əsəri. Qərbli qadının oxuduğu kitabdan gözünün qarşısında gətirdiyi bu əsrarəngiz eşq nümunəsindən ilham alaraq həyatını dəyişməsi, bir çox qadınlara güc və iradə mənbəyi ola bilər. 

Həyatlarımızın durğun gölünü dalğalandıran daş kimi, üzləşmək məcburiyyətində olduğumuz çətinliklər, ağrılar… və məhəbbət uğruna keçməli olduğumuz çətin yollar, qurban verdiklərimiz… 
“Aşk”- kitab içində kitab, həyatın mənası  axtarışında  bir eşq macərası… 
“Aşk “ Elif Şafakdan  axtarışa,  gerçəyə və kəşf etməyə dair bir roman..

6.      Yad qadına məktublar – Andre Morua 

 

«Yad qadına məktublar» – insan qəlbinin mahir bilicisi adlandırılan görkəmli fransız yazıçısı Andre Moruanın (1885–1967) xüsusi janrda qələmə alınmış ən yaxşı əsəri, ədəbiyyat mütəxəssislərinin yekdil fikrincə, tayı-bərabəri olmayan sənət incisi sayılır.

Bioqrafik romanlarından fərqli olaraq, ümumilikdə 56 essedən ibarət olan bu məktubları böyük sənətkarın «bəşər övladına səmimi ürək sözləri», yaxud «gələcək nəsillərə tövsiyələri» kimi də dəyərləndirmək mümkündür.

7.      Səhra çiçəyi – Varis Dirie

Varis Dirie onu dünyalarca məşhur edən bu romanı yazmaq üçün nə təxəyyülünə güc verib, nə də başqalarının həyat hekayələrini soraqlayıb. “Səhra çiçəyi” müəllifin öz başına gələnlərdir: kəlməbəkəlmə, addımbaaddım yaşadıqlarıdır. Allahın sevib yaratdığı insana əta etdiyi gözəlliklərdən necə məhrum edilməsi, həyat eşqinin hələ körpə qızcığazkən balaca köksündə boğulması, dün­yəvi həzlərə həsrət qoyulması barədə olduqca qəmli bir hekayət danışır Varis. Somalinin dodaq çatladan susuz səhralarında boy atan bu çiçək, onu məhv olmağa qoymayan, bu günün Varisi edən sevgidən, insanlara, yaradılışa inamdan rişələnir. İllər sonra məşhur model olan qəhrəmanımız geridə qoyduğu tarixçəsini bölüşməyi özünə borc bilir – beləcə, “Səhra çiçəyi”ni yazmaqla özünü yazıçılıqda da sınayır. Varis Afrikanın dəhşətinə çevrilmiş “qız sünnəti”nin onu necə şikəst etdiyini anladığı andan buna qarşı mübarizə aparmağa çalışıb. “Səhra çiçəyi” həm də bu mübarizənin bir for­masıdır. Tezliklə bestsellerə çevrilən əsəri ilə o, daha da məşhur olmaqla bərabər böyüklərin əlində alətə çevrilən qızcığızlara qurtuluş yolu da göstərmiş olub.
“Səhra çiçəyi” məhz o əsərlərdəndir ki, təsirini xeyli müddət özünüzdən uzaqlaşdıra bilməyəcəksiniz.

8.      Stressə qarşı peyvənd – Valeri Sinelnikov

Nəzərə alsaq ki, evin yükü çox vaxt qadınların çiyninə düşür və üstəlik qadın həm də işləyirsə, o zaman onlar üçün stress qaçılmazdır. Nəyinki qadınlar, hər bir stressdən əziyyət çəkən insan bu kitabda sakitlik tapacaqdır.

V.Sinelnikov – tanınmış və təcrübəli psixoterapevt, psixoloq, sadəliyi və müalicəvi effektliliyinə görə minlərlə adama sağlamlığını qaytarmağa, rifahını yüksəltməyə, həyat sevincini dərk etməyə kömək edən unikal psixoloji metodikaların müəllifidir. Onun kitablarından hələ lazımınca ifadəsini tapmamış, instinktiv gücünüzdən qüvvə və enerji toplamaq, öz problemlərinizdən baş çıxarmaq, stress və xəstəliyin nə olduğunu birdəfəlik unutmaq üçün necə istifadə etməyi öyrənəcəksiniz. Kitab müalicəvi gücə malikdir və onun pozitiv təsiri onu əlinizə götürdüyünüz andan başlayır.

9.      Xoşbəxt insanlar kitab oxuyar və kofe içər (Счастливые люди читают книжки и пьют кофе) - Agnès Martin-Lugand

Oğlunu və qızını avtomobil qəzasında itirən Diana, həyata marağını tamamilə itirir. Parijdəki həyatı ona ailəsini itirəndən sonra sıxıcı və ağrılı gəldiyinə görə İrlandiyanın şimalına köçür. Kitab onun sonrakı həyatında baş verənlərdən bəhs edir. Bir qadının gücdən düşməməsi və həyatında ən əzizlərini itirəndən sonra yaşamağa davam etməyə yenidən güc tapmaqdan bəhs edir.  

10.   KİŞİLƏR Marsdan, QADINLAR Veneradandır – John Gray

Bəzən kişi və qadınların sevgi münasibətlərində fikir ayrılığı, lazımsız dava-dalaş və mübahisələr yaranır. Bu da çox vaxt səbəbsiz ayrılıqlara səbəb olur. Bu kitab münasibətlər arasındakı gərginliyin səbəbini izah edir.
Con Qrey cinslər arasındakı fərqləri dərindən araşdırıb sağlam sevgi münasibətləri qurmaqda sizə yol göstərən praktik bələdçidir. Həyatınızı sevgiylə doldurmaq, xoşbəxt olmaq sizin də haqqınızdır! Sevgi ecazkardır və fərqlərinizi xatırladığınız halda həyatınıza rəng qatmaqda davam edəcək.

Hər kəsə xoş mütaliələr :)

Sevgilərlə: Fidan H.   

15. Noyabr. 2017

November books review

 

Noyabr ayı ərzində nəhayət ki çoxdan istədiyim kitabları oxuya bildim. Kitabların hər birini instagram kitab səhifəmdə (@books.coffee.travel) ayrıca paylaşıb fikirlərimi bildirsəm də bu paylaşımda hər bir oxuduğum kitaba qısaca xülasə vermək istərdim. 

1. Akilah Azra Kohen - "Fi"  - Həmişə kitab mağazalarında dizaynı məni cəlb edən bu kitabı əlimə götürüb yenə yerinə qoyurdum (həm çox baha həm də türkcə romanlar oxumadığıma görə). Nəhayət Ali və Nino'da həftənin fürsəti olaraq gördüm və şansı qaçırmamağıma görə də peşman deyiləm. Akilah Azra Kohen çox içdən və çox maraqlı şəkildə kitabda real cəmiyyətin iç üzünü açmış və personajların vasitəsilə cərəyan edən hadisələrin içində bu informasiyanı insanlara ötürmüşdür. Əsərin baş qəhrəmanı sayılan məşhur psixoloq və teleaparıcı Can Manay təsadüfən gördüyü balerina Duruya aşiq olur və onu sevgilisi Deniz`nin əlindən almaq üçün kitab boyu böyük cəhdlər göstərir. Bununla yanaşı bir sıra personajların simasında cəmiyyətdə baş verən bu və digər tip hadisələrin iç üzü kitabda çox möhtəşəm şəkildə açılır və insanların məqsədləri uğrunda hətta pis nəticələr verə biləcək yollara da əl atması geniş formada təsvir olunur. Kitab bununla bitmir və ardı Çi və Pi-də tamamlanır.

2. Akilah Azra Kohen - "Çi"  - Fi seriyasının davamı olaraq Çi kitabında bir çox həqiqətlər daha qabarıq şəkildə göstərilmişdir və mənim şəxsən 1ci kitabdan çox bu kitabda yazılanlar yaddaşımda dərin iz buraxdı. Mənə çox suallar verirlər ki kitabların adları ilə içindəki mövzunun əlaqəsi nədir, cavabı deyim ki heç bir əlaqə yoxdur  Sadəcə əsərin 1-2 yerində bu adlara uyğun sözlər işlənmişdir məsələn Çi enerji bildirir və bəzi personajların bu enerjiylə dolub daşdığını kitabda bir neçə məqamda qeyd edilir. Məncə müəllif sadəcə diqqət cəlb eləmək üçün bu adlardan istifadə etmişdir və açıq etiraf edim ki məni də bu kitablarda ilk cəlb edən adları və kitabın rəngli dizaynı olmuşdur  Bu kitabda da eyni mövzular davam edir və əsərin baş qəhrəmanı Can Manay Durunu əldə edəndən sonra balerina var dövlətin heç də xoşbəxtlik gətirmədiyini və bu cür manyak sevginin sadəcə qurbanı olduğunu görüb evdən qaçır və bundan sonra da baş verənlər Pi kitabında davam edir. Təbii ki mən burda bütün kitabdakı hadisələr haqqında yazmamışam və çox qısa və konkret olaraq mövzunu və mahiyyəti qeyd etdim ki oxumaq üçün başqa şeylər də qalsın əks halda mövzunu bilib oxumaqdan boyun qaçırırıq.  Noyabr ayında Pi kitabını əldə edə bilmədiyimdən dekabra saxladım və artıq Pi kitabını alıb qışın soyuqlarında oxumağa saxlamışam. Onu da deyim ki Fi kitabı 500, Çi kitabı 375, Pi kitabı isə 700 səhifədir.

3. Paulo Coelho "Maktub"  - Coelho yaradıcılığının oxucusu kimi bu kitabdan yan keçə bilməzdim. "İşıq savaşçısının kitabı"ndan sonra bu tipli növbəti kitabını oxuduğum yazıçı özü də "Ön söz"də qeyd etmişdi ki bu kitabı ərsəyə gətirəndə nə yazacağını heç dəqiq bilmirdi. Dünyanı gəzərək öz müəllimlərindən və həyat təcrübələrinə əsaslanaraq kiçik fraqmentlər və ya hekayələr toplusunu ərsəyə gətirib kitab şəklində oxuculara təqdim etmişdir. Kitabda həyata baxışa dair müxtəlif dini, psixoloji və fəlsəfi fikirlər yer alır. Mənim nöqteyi nəzərimdən baxdıqda öyrənmək üçün bir çox fikirlər özündə birləşdirən bu  kitab həyatda bəzi addımları atmaqda insana kömək edə bilər. 

4. Paulo Coelho "Rio Pyedranın sahilində oturdum və ağladım"  -  Bu kitabı oxumaq yox hiss etmək lazımdı deyərdim. Əsərin baş qəhrəmanları olan Pilar və onun uşaqlıq dostunun arasında olan sevgiləri hələ kiçik yaşlarından qığılcımlanır lakin oğlan dünya səyahətinə çıxaraq şəhəri tərk edir. Amma bütün bu zaman ərzində Pilara daim məktublar yazır və 10 ildən sonra onlar görüşürlər və oğlanın rahib olma yolunu seçdiyini eşidəndən sonra sevgiləri əlçatmaz bir xəyala çevrilsə də onun uğrunda hər 2si mübarizə aparmağa başlayır. Əsərdə təkcə sevgidən deyil İlahi eşqdən geniş şəkildə bəhs edilir və Tanrı, din, yaradılış, məqsəd və insan arasındakı əlaqə geniş şəkildə və qəlbə yayılan sözlərlə izah olunur. Kitabı çox sevdim və yenidən oxumağı düşünürəm.

5. Richard Bach "Conatan Livingston adlı Qağayı" -  Mən bu kitabı sadəcə sevdim! 1 neçə saat ərzində oxuyub bitridiyim səhifələrin hər birində altından xətt çəkdiyim cümlələrin sayı bitmək bilmir. Bir insan bənzətməni bu qədər gözəl edə bilərmiş! Müasir insanların taleləri qağayılara bənzədilib çünki insanlar da onlara verilmiş bir çox qabiliyyətləri görməzdən gəlir və həyatlarını məhdudlaşdıraraq heç bir məqsədə qulluq etmədən sadəcə yemək üçün qazanıb və adi həyat tərzi ilə yaşayırlar. Bu normalara sığmayan Conatan Livinqston uçmağın daha dərin sirrlərinə yiyələnmək üçün hərgün məşq edir və digər qağayılardan fərqli olaraq çox yüksək sürətlə uçmağa başlayır və bunu görən dəstə onu limitlərdən kənara çıxdığı üçün dəstədən qovur və bununla da Conatanın həyatı tamamilə dəyişir. Əlbəttə ki povest alleqorik xarakter daşıyır və qağayıların timsalında insanlar, dinlər, inanclar, arzular və insanın fikir gücü haqqında müxtəlif fəlsəfi fikirlər yer alır. Bu kitab müəllifin oxuduğum 2ci kitabdır ilk dəfə isə Londonda oxuyarkən onun "Illusions" (Illuziyalar) kitabını oxumuşdum və həmin kitab da eyni mövzuları əhatə edirdi. Bir sözlə Richard Bach da Coelho kimi favoritimə çevrildi 

Ölməzdən öncə (etməli olduqlarım).

3 gün əvvəl endirimdə olduğu üçün bu kitabı aldım. Düzü bu tip nə filmləri nə də kitabları sevmirəm, ama kitabın təsvirində “arzularını həyata keçirmək üçün əlindən gələni edən 16 yaşlı qızın hekayəsi” yazılmışdı. Kitab haqqında verilən rəylər də “Daily Express” və “Guardian” kimi böyük yerlərdən idi deyə tərəddüd etmədən kitab üçün şəhər yollandım. Ama kitabın ilk səhiflərini oxumağa başlayanda məyus oldum. 16 yaşında qız xərçəng diaqnozu ilə həyatının sonuna sayılı günlər qalıb deyə arzularının siyahısın tutub və onları bir bir həyata keçirmək üçün səy göstərir. Kitabı rus dilində oxuduğumdan daha axıcı gəldi və özümü məcbur edib oxudum. Oxumağıma da heç qəti peşman olmadım. Bu tip kitablardan biri də John Green-in “The fault in our Stars” (Виноваты звезды – Eyni ulduzun altında) əsəridir ki filmi dünyaya çox böyük səs küy saldı. Onu oxumadım, filminə də heç baxmadım çünki heç bu tip mövzular mənim tipim deyil.  Ama bu oxuduğum “Before I die” (Пока я жива) kitabı həqiqətən mənim yaddaşıma dərin izlər buraxdı. Kitabda yazıçının bəzi cümlələri insanın içini titrədən səviyyədə səmimi idi və hətta təəccübləndim ki bir qadın özü düçar olmadığı bir xəstəliyi necə bu qədər aydınlıqla 16 yaşlı yeniyetmənin dilindən təsvir edə bilərmiş..

Kitabı 3 günə bitirdim təbii ki paralel motivasiya kitabı oxumasaydım daha tez də bitirərdim. Və bu oxuduğum möhtəşəm əsər mənim bəzi fikirlərimə böyük aydınlıq  gətirdi.

Bundan öncəki bloqumda bildirdiyim kimi xoşbəxt olmağı arzulamaq yox elə anındaca xoşbəxt olmağı bacarmaq lazımdı. Bizim malik olduğumuz hər bir şey bizə adi gəlir. Elə bilirik bu belə yaranıb və belə də olmalıdı. Halbuki bizdə olan şeylər bir çoxunun arzusudur. Məsələn götürək elə sağlamlığı. Gözəl bir kəlam varki insan sağlamlığın qədrini yalnız xəstələnəndən sonra bilir. Bu kitab da məhz bu cümlənin üzərində qurulmuş bir əsərdi. Düzü mən onu oxumamışdan artıq anında xoşbəxt olmağı bacarmışdım, indi isə artıq içdiyim hər qurtum suya görə də Yaradana təşəkkür etmək istəyirəm. Əlimizdə olanlarla bugün və burada sevinməyi və xoşbəxt olmağı bacarmalıyıq. Çatışmamazlıqlar hər zaman olacaq çünki 100%lik ideal həyat mövcud deyil. Amma əsas olmayanlara görə heyfslənərək yox, olanlarımıza şükr etməklə yaşamağımızdır. Düzdür, olanlara qane olub oturmaq da düzgün deyil əgər Yaradan sənə daha çoxunu əldə etmək potensialını veribsə (və təbii ki tənbəllik olmasa bu potensial hər bir insanda var) insan daha yaxşılarını da həyatına qatmağı bacarmalıdır və arzularının ardıyca getməlidir. Amma bəzən insan malik olduqlarını unudaraq daim malik olmadıqlarının həsrətiylə yaşayır və bu həsrət insanı xoşbəxtlik hissindən məhrum edir.

Mən uşaq olandan səmanı çox sevirəm və demək olar ki daim göyə baxanda yeri unuduram. Həmişə qalaktikanın şəkillərinə böyük acgözlüklə baxıram və kainat ilə bağlı hər bir xırda məqamla maraqlanır və həvəslə kainat haqqında informasiyanı süngər kimi özümə çəkirəm. Həqiqətən səmaya baxıb insan xoşbəxt ola bilir. Ən azından Yaradan səni sayıb bu ucu bucağı olmayan böyük Kainatda yaratdığına görə özünü hələ də yaranmayanların arasında seçilmiş hiss edir və Yaradanına təşəkkür edirsən. Səma özü böyük bir möcüzədi. Təsəvvürünüzə gətirin ki 149.6 million km məsafə bizdən uzaq olan günəş ən hündürü təxminən 6000 metr olan buludların arxasından görünəndə necə əsrarəngiz mənzərələr yaranır. Bunu duymaq özü bir gözəllikdi, zövqdü! Yer kürəsi öz oxundan 1 mm kənara çıxarsa tamamilə buz bağlar və ya 1 mm günəşə tərəf gedərsə od tutub alışar. Və bu möcüzəyə görə həqiqətən şükr etməliyik və hər yeni günü Yaradanın bizə boşuna vermədiyi üçün onu dəyərləndirməliyik.

Və hər verilən günün içində milyonlarla bu cür gözəl məqamlar var ki biz onları qaçırırıq. Amma xəstə insanlar, və ya ömürlərinin bitəcəklərini bilənlər bu xırda məqamlara daha həssas yanaşır və onlardan maximum zövq almağa çalışır. Maraqlıdır ki bu onları xoşbəxt edir və sanki bu gözəlliklərdən ayrılmaq istəmirlər.. Bəs niyə sağlam insan bunları görsə də xoşbəxt ola bilmir? Çünki insan elə bilir o elə əbədiyən belə yaşayacaq.. Öləcəyini bilir ama buna sanki inanmır, təsəvvür eləməkdən qorxur və sanki bu qorxuyla ölüm də ondan uzaqlaşır. Amma ölümü xatırlamaq hər günündən zövq almaq üçün çox gözəl bir vasitədi. Hər bir şey bir sonu olduğu üçün elə maraqlıdı.

Mən onun da tərəfdarı deyiləm ki insan hər gün ölümünü düşünərək yaşasın, yox, əsla. Ən azından insan malik olduqlarıyla elə anındaca xoşbəxt olub zövq almalıdı və hər zaman Yaradanına minnətdar olmalıdı. Ən pis halda belə yenə malik olduğu yaxşı şeyləri xatırlayıb Yaradanına şükr etməlidi. Məsələn, qanın analizi yaxşı çıxmayıbsa o hələ də 2 ayağı üstə yeriyə bildiyi, görə və eşidə bildiyi üçün şükr etməlidi. Şikayətcil insan əlbəttə ki heç vaxt heç nəyə qane olmayacaq və ömür boyu da elə hər bir şeyə neqativ yanaşaraq özü özünü içdən yeyib bitirəcək.

Biz bəzən xırda şeyləri problem edirik. Yaxınlarımızın qəlbini qırırıq. Elə bilirik ki əbədi yaşayacağıq və hələ vaxtımız olacaq ki könüllərini alaq. Və bəzən yaşlı nəsil cavanlara sanki paxıllıq edərək “sən cavansan, hələ gələcəyin qabaqdadı, bizim isə üzümüz o tərəfədi” deyərək emosional şantaj da edirlər. Ama heç kim ölümdən sığortalanmayıb və heç kəs əminliklə deyə bilməz ki sən məndən çox yaşayacaqsan. Rəhmətlik nənəmin bir sözü var idi “o qədər ağac qala qala cavan budaqları sınır ki”...

Bunu yazmaqda məqsədim insanları qorxutmaq deyil, əskinə həyatdan var gücləri ilə zövq almağa çağırmaqdı. İnsanlar gündə 9 saat işləyirlər sanki əbədiyyən yaşayacaqları həyat üçün tədarük yığırlar. İl ərzinə 12 ay işləyib cəmi 1 ay məzuniyyət götürərək dincəlirlər sanki əbədiyyən o bir ayları yığanda bir ömür edəcək. Səhərləri yuxudan gec durmağı az deyil hələ günorta da bir 2-3 saat yatanlar var ki sanki əbədiyyətə qədər boş saatları var. “Vaxt öldürürəm” deyənlər var ki daha düşünmürlər ki vaxt onların günlərini alaraq onları öldürür. Bütün günü virtual aləmdə öz xoşbəxtliklərin facebook statuslarına gələn like-larda, instagram şəkilində dodağını uzadaraq şəkil çəkdirib 100 əlavə effekt verərək real olmasa da özünün gözəlliyinə vurulan qızlar var ki təbiətin onlara bəxş elədiyi real gözəllikləri görməkdən özlərini məhrum edirlər. Siz axı bilirsiz ki vaxtınız limitlidi. Bəs niyə onu heç tükənməyəcəkmiş kimi sağa sola boşuna xərcləyirsiz? Qocalıq vaxtında ama “imkanım olsaydı zamanı geri qaytarıb vaxtımı daha xoşbəxt keçirərdim” deyənləri də az görmədim.

Odur ki vaxt elə indidir, elə bu andır. Heç kimin qəlbini qırmayın, heç kimi incitməyin. Xoşbəxt olmaq istəyənlərin yolunda dayanmayın, heç kimin paxıllığın çəkməyin və hər gün malik olduqlarınızdan doya doya zövq alsanız inanın ki pis zənnə qapılmağa, şübhələrlə yaşamağa, nələrəsə görə narahat olmağa heç vaxtınız da olmayacaq. Gələcək üçün isə narahat olmağa dəyməz. Hər şey Ali Qüvvənin əlindədirsə, sən etməsən O etməyəcəkmi? Allah istəsə sən istəməsən də olmayacaqmı? Sən əlləşib vuruşmasan Allah yetirməyəckmi? Sən bir yaxşılıq eləsən Allah sənin 10 arzunu yerinə yetirməzmi? Ən azından hər gün hələ də sağ və sağlam olduğumuza, görə və eşidə bildiyimizə, dadlardan zövq aldığımıza və suyu içib susuzluğumuzu yatıra bildiyimizə, oksigeni ciyərlərimizə rahat rahat çəkə bildiyimizə, ac olmadığımıza və əzizlərimizin sağ və sağlam olduğuna şükr etməli və sevinməliyik. Bu xırda detalların bizim üçün nə qədər əhəmiyyətli olduğun onları itirmədən anlamalıyıq ki doya doya həyatımızdakılardan zövq alaq və daha da gözəllərini yaşayaq.

Bura qədər oxuduğunuz üçün təşəkkür edirəm :) 

Həvəsiniz olsa bu kitabı oxuyun və ya ən azından əsərin əsasında çəkilmiş filmə baxın ki həyatınızın qədrini biləsiniz.

Filmin adı : "Now is good" (Сейчас самое время )

Fidan Həbibli.   12sindən 13ə keçən gecə Avqust, 2016

Mən xoşbəxtəm! Kitabdan sitatlar.

Hörmətli izləyici. Artıq bloqumda oxuduğum kitablar və onlar haqqında fikirlərim də bundan sonra geniş yer alacaq. Maraqlandığınız kitablar və ya məsləhət biləcəyiniz müəllif və romanlar varsa aşağıdakı rəylərdə (comments) öz fikrinizi yazmaqda ürəkli olun :)

Bugün hələ də oxuduğum bir kitabdan bəzi çox bəyəndiyim qeydləri yazmaq istəyirəm. 1 həftə əvvəl Natalia Pravdina adlı müəllifin bir kitabını oxudum. Kitab mənə çox gözəl və fərqli bir təsir bağışladı. Düzdü, bu tip kitablar çox oxumuşam və buna misal olaraq Joseph Murphy, Ronda Byrne, Natalia Pravdina, Napaleon Hill, John Kehoe, Joe Vitale və s. misal göstərə bilərəm. Amma bu kitab çox axıcı bir dildə yazılmış və məlumatlar digər sevdiyim müəlliflərin fikirlərini daha gözəl ifadə etmişdir. Mənim çox sevdiyim və 30a yaxın kitabını oxuduğum filosof Joseph Murphy-nin bir növ ardıcılı olaraq Natalia Pravdina Sankt Peterburqda böyüyüb başa çatdığına görə bizim ölkənin psixologiyasına daha yaxın formada yazır. Kitabda ən bəyəndiyim nüanslardan bəzilərini bura qeyd kimi götürmək istəyirəm.

1.       Allah bizləri xoşbəxt yaşamaq və həyatdan həzz almaq üçün yaratmışdır.

2.       Bizim hər birimiz əlçatmaz və çox güclü bir mənbədən yararlanırıq. Vacib olan o gücü dərk etmək, ona tərəf addımlamaqdır.

3.       İstənilən əlçatmaz arzuların çin olması mümkündür.

4.       Gözəl şeylər və qiymətli əşyalar görən zaman “niyə bunlar mənim deyil” deyə özünüzü acı fikirlərlə yükləməyin! Sevinin! Sevinin ki bunlar var. Uğura nail olan insanlara paxıllıq etməyin, onlara xeyir dua verin.

(P.s. - Burda müəllifin qeyd etmək istədiyi gözəl bir nüans var: paxıllıq. İnsan övladının sanki qanında var bu hiss və həqiqətən bu hiss çox mənfi, neqativ və insanın özünü məhv edə biləcək dağıdıcı bir hissdir. İnsan paxıllıq hissinə qalib gələ bilərsə içində çox rahat bir abu hava yaranar ki onun həyat enerjisini, sağlamlığını və gözəlliyin artırar. Paxıllıq elədiyiniz insana dua eliyin. Çox çətin olsa da ama ona hədiyyələr bağışladığınızı düşünün, fikrən özünüzü ondan azad edin. Sizdə də Allahın yaratdığı bir çox şeylər var ki başqalarında yoxdur, buna görə də şükr edin.)

5.       Sizə verilən hədiyyəni heç vaxt pisləməyin, sizə deyilən komplimentləri qəbul edin və sizə “bugün çox gözəl görünürsüzüz” deyilərkən əvəzində “yox nə danışırsınız? Bugün çox yorğunam, saçım səliqəsizdir, bu paltarı 100 ildir geyinirəm” deməyin. Nə zaman sizə bunu desələr o zaman gülümsəyin və təşəkkür edin.

6.       “Qara gün” üçün pul ayırmayın, yoxsa doğurdan da o gün gələr. Ondansa pullarınızı xeyrli şeylərə invest edin.

7.       Yeniliyin üzünə açıq olun. Həyatınızda hər hansı yerni bir adam görünməyə başlasa, ondan dərhal qaçmayın. Bəlkə o sizə tamamilə gözləmədiyiniz yeni imkanlar yaratmaq üçün sizə göndərilib. Ona tərəf birinci addımı siz atın.

8.       Tezliklə böyük yeniliklər tələb etməyin! Deməyin ki pozitiv düşüncə işləmir. Buna müəyyən vaxt lazımdır. Bu mütləq baş verəcək, nə vaxt baş verməsi isə müəyyən faktorlardan asılıdır. Ona görə inamlı olun və sizdə hərşey alınacaq!

9.       Qəlbinizdə təkcə öz uğurunuza görə sevinməyin, həm də başqalarının uğurlarına sevinməyi öyrənin!

10.   Xoşbəxtlik hissi sizin ən dərində olan arzularınızın həyata keçməsinə, onun boy atmasına kömək edir.

11.   Öz çevrənizə xoşbəxtlik, sevinc və sülhpərvərlik enerjisi yayımlayın. O zaman uğur özü sizi tapacaq.

12.   NƏYİN HAQQINDA DÜŞÜNÜB DAŞINIRIQSA TƏZƏDƏN QÜVVƏTLƏNMİŞ HALDA ÜSTÜMÜZƏ QAYIDIR.

13.   Özünüzdə sevinc dünyası qurun və onu müdafiə edin. Ruhunuzun gücünə inanın. Öz duruşunuza və üzünüzün ifadəsinə diqqət yetirin. Öz bədəninizə qulluq edin və onu sevin. Həmişə parlaq və gülərüz olun ki uğur sizi tapsın.

14.   Xoşbəxt olmağa çalışmayın, xoşbəxt olun! “Mən xoşbəxt olmaq istəyirəm” deməyin elə indicə xoşbəxt olun!

15.   Mənim xoşbəxtliyim Allaha olan sevgim qədər hüdudsuzdur!

Qeyd edim ki kitabı hələ bitirməmişəm. Bu kitabın bir hissəsi idi, digər yarısından olan qeydlərimi növbəti yazımda ətraflı şəkildə sizlərə çatdıracağam.

Enjoy the life! :)

Fidan Həbibli.  05 Avqust 2015

Mən sənin qanında olum...

Gözümü yumub bir an istədim yanında olum,

Sən mənim qanımda ol, mən sənin canında olum.

Yaradan bəxş eləyib gör nə cür cahanı mənə,

Qıydı zərif bədənə verdi imtahanı mənə,

Çox görmə sən əzizim cismindəki canı mənə,

O canı qanıma qat qoy hər an yanında olum,

Sən mənim qanımda ol, mən sənin canında olum.

Varlığın fəxrimdir, isminsə başımın tacı

Hər sözün cana məlhəm, eşqin dərdimin əlacı,

Sənsiz saatlar qəhər, olsa da zəhərdən acı

İçirəm yoxluğunu qoy dəli divanən olum,

Sən mənim qanımda ol, mən sənin canında olum.

Həsrətin həyatımda acılarımın ən şirini

Saxlaram ürəyimdə sənə məxsus şah yerini

Versədə yüzlər mənə sarayların min birini

Almadım, istədim ki viran sarayında olum,

Sən mənim qanımda ol, mən sənin canında olum.

Saxlayıb günlərimin səninçün ən gözəlini,

Gözlədim illər boyu həyatımın özəlini,

Saymıram mən ömrümdən sənsiz keçən əzəlimi,

Qoy sənin həyatında qönçə bir fidanın olum,

Sən mənim qanımda ol, mən sənin canında olum...

Gözümü yumub bir an istədim yanında olum,

Sən mənim canımda ol, mən sənin qanında olum...

Fidan Həbibli,  01 Avqust 2016