Sən “SƏN” olacaqsan! (2014, London)

Öyrənəcəksən bu həyatda tək qalmağı,

Hər dəfə yıxılınca, özün tək ayağa durmağı öyrənəcəksən!

Təklikdə bütövləşəcəksən,

Yaşayacaqsan..

Yaşlanacaqsan...

Kimsədən asılı olmamağı öyrənəcəksən!

İstər maddi, istər mənəvi, istər cismani.

Sahib çıxacaqsan özünə

Kimsələrə əzdirməyəcəksən mənliyini

Çox istəyib bildirməyəcəksən,

Darıxacaqsan amma gizlədəcəksən

Gizlənəcəksən hərdən hamıdan

Qaçacaqsan özün özündən bəzən

Sındıracaqlar qəlbini sən yumşaq görününcə,

Yapışdırıb yenə sən olacaqsan

Baxdığın, toxunduğun hər şey

Gəzdiyin, gördüyün hər yer çirkab olsa da,

Sən təmiz qalacaqsan!

Qoymayacaqsan zəmanə səni də özünə oxşatsın

Sən “SƏN” olacaqsan!

Dəyişməyəcəksən nəyəsə, kiməsə görə.

Sənin paxıllığını çəkənlərə,

Sənin yıxıldığını görmək istəyənlərə

Sən xoşbəxtlik arzulayacaqsan!

Səni incidənlər, ağladanlar üçün

Sən dua edəcəksən!

Hər şeyə rəğmən qəlbini pak saxlayacaqsan!

Ağlayacaqsan, hönkürəcəksən,

Dərdini səmalara açacaqsan

Amma sıxıntını heç kimə bildirməyəcəksən!

Ya bir yazı yazacaqsan,

Ya şəkil çəkəcəksən.

Alınmasa da edəcəksən, sırf sakitləşməkçün.

İçindəki əzabları materiallaşdırıb sənətə çevirəcəksən

Amma bunu heç kimə bildirməyəcəksən.

Zamanla aldanacaqsan yenə

İnandıracaqlar sevdiklərinə

Amma əzizlərinə, qohumlarına belə inanmayacaqsan!

Bel bağlamayacaqsan heç kimə

Sarılmaq istəsən dizlərinə sarılacaqsan,

Danışmaq istəsən kölgənlə, güzgüdəki əksinlə danışacaqsan!

Möhkəmliyini göstərdikcə əzəcək səni həyat

Sən yenə sabahlarına inamla gözləyəcəksən!

Güləcəksən!

Bütün olanlara rəğmən

Yenə güləcəksən...

Səni ağladanların üzünə güləcəksən!

Gülüşünü onlara sədəqə edəcəksən!

Səni anlamayanları sadəcə seyr edəcəksən,

Yaxınlaşmayacaqsan, danışmayacaqsan cahillərlə.

Sağalacaq yaraların

Sən gücləndikcə daha güclülərlə üzləşəcəksən

Qarşına yeni cəbhələr çıxacaq

Eyni zamanda bir neçə cəbhəylə vuruşacaqsan

Tək başına..

Öyrənəcəksən müxtəlif qüvvələrə qarşı tək çıxmağı

Bəzən tapdalıyıb keçəcəklər səni...

Var gücləriylə əzəcəklər...

Ağrılarından ruhun canından çıxmaq istəsə də

Təslim olmayacaqsan!

Yaralarına basıb biraz da möhkəmlənəcəksən!

Gözlərin qan ağlasa da

Ürəyin “təslim ol” desə də,

Hər şeyini itirsən də mübarizələrdə

Bir tək imanını, inamını itirməyəcəksən!

Yaradan dayağın, dualar silahın olacaq

Və sən sonda qalib çıxacaqsan.

Səni məhv etmək istəyənləri

Sən əhv edəcəksən..

Arxada buraxıb hamını və hər şeyi

Arxana baxmadan çıxıb gedəcəksən meydandan qalib kimi!..

Və sən “SƏN” olacaqsan

bir nümunə kimi..

Rəqiblərin belə səninlə fəxr edəcək

Heç kimə nifrət eləmədən yaşayacaqsan

Yaşlanacaqsan.. və,

Öyrənəcəksən bu həyatda tək qalmağı!

Özün iki ayağın üstə başını dik tutub

Qalxmağı öyrənəcəksən!...

Fidan Həbibli

\to the music
Melody in my head (Rene Osmanczyk)

18 Oktyabr 2014